دخلوا البيت الساعة 11:30 الظهر.. كسروا الباب.. ضربوني أنا و بنت عمي.. أختي الحامل سابوها لكن بنت عمي عايده [أحمد خنيزي] عندها كدمات كبيرة، ضربوني بالخرزانه في كل جسمي، جرجروني من شعري نزلوني للبوكس، رحنا المركز وسابونا هناك، من الساعة 12 الظهر للساعة 2 كنا تسعه في أوضة واحده بدون أكل أو شرب.. دخلوا على بيتنا هجم لأن الناس كانت بتتحامى فينا. ضربوني و ضربوا بنت عمي، صحوها من النوم، حتى أمي كانت قاعده و شايلة عيل، ضربوها بالعصاية في وشها. كانوا عايزين يقلعوها النقاب. الضابط محمد عمار مسكها من شعرها و بقى يخبط رأسها في الحيط و شد النقاب قطعوه و دخل علينا بالفاظ فظيعة.. رديت عليه، أنا مش بت و مش بشتغل عند حضرتك، ضربني و جرني من شعري جر على البوكس مسافة كبيرة.

في القسم قلت له: حضرتك متعلم أزاي تقول ألفاظ زي دي؟.. رد و قال: أحنا بندرسها في الكتب.. وبعدين قاللي "أنت لسانك طويل و مستقبلك كويس" قلت له "مستقبل في إيه بقى، السرقة ولا الشحاتة بعد ما أخذتم أرضنا"

الاصابات: كدمات متعددة في الأطراف السفلي

الحملة المصرية لاسترداد الكرامة المصرية
شارك بحملتنا لاسترداد كرامتنا
نعم للمعاملة بالمثل